तेह्रथुम/नेपाल पत्रकार महासंघ यूके शाखाको नेतृत्व हाल बिमला सेनेले सम्हालिरहनुभएको छ । २०८१ असार ३० गते सम्पन्न निर्वाचनबाट उहाँ अध्यक्षमा निर्वाचित हुनुभएको हो । यससँगै उहाँ महासंघ यूकेको इतिहासमा पहिलो महिला अध्यक्ष बन्न सफल हुनुभएको छ ।
पत्रकारिता तथा सामाजिक क्षेत्रमा लामो समयदेखि सक्रिय रहँदै आउनुभएकी सेने नेपाल आदिवासी जनजाति महासंघ यूकेको पूर्वमहासचिव समेत हुनुहुन्छ । उहाँले सञ्चालन गर्दै आउनुभएको “गोर्खा च्यानल मिडिया” बेलायतस्थित नेपाली समुदायबीच लोकप्रिय सञ्चार माध्यमका रूपमा परिचित छ ।
तेह्रथुमको सोल्मास्थित रत्न माध्यमिक विद्यालयबाट जनजातितर्फ एसएलसी उत्तीर्ण गर्ने पहिलो महिला तथा उच्च शिक्षा हासिल गर्ने पहिलो महिलामध्ये एकका रूपमा उहाँ चिनिनुहुन्छ । अध्ययन, परिवार र पेशालाई सन्तुलित रूपमा अघि बढाउँदै उहाँले आफ्नो जीवनयात्रालाई निरन्तर संघर्ष र सफलतासँग जोड्नुभएको छ ।
विवाहपछि श्रीमान्सँग हङकङ पुग्नुभएकी उहाँले त्यहाँ वीएफएस रेडियो (ब्रिटिस फोर्सेस ब्रडकास्टिङ सर्भिस) मा काम गर्दै व्यावसायिक जीवनको सुरुआत गर्नुभएको थियो । नेपाल फर्किएपछि एकाउण्टेन्टका रूपमा काम गर्नुका साथै सप्तकोशी एफएममार्फत समाचार वाचन तथा कार्यक्रम सञ्चालन गरेर सञ्चार क्षेत्रमा आफ्नो सक्रियता विस्तार गर्नुभयो ।
महिला आर्थिक रूपमा सक्षम र आत्मनिर्भर नभएसम्म समाजमा वास्तविक परिवर्तन सम्भव हुँदैन भन्ने विश्वासका साथ उहाँले इटहरीका महिला साथीहरूसँग मिलेर महिला बचत तथा ऋण सहकारी स्थापना गर्न महत्वपूर्ण भूमिका निर्वाह गर्नुभयो । उक्त सहकारी आज महिलाद्वारा सञ्चालित सफल संस्थामध्ये एकका रूपमा परिचित छ ।
सञ्चार क्षेत्रसँगै सामाजिक सेवा, सहकारी अभियान तथा संस्थागत नेतृत्वमा पनि उहाँको सक्रिय भूमिका रहँदै आएको छ । इटहरी जेसीसको अध्यक्षका रूपमा नेतृत्व सम्हाल्नुभएकी उहाँ रेडक्रस सोसाइटी, रोटरी क्लब इटहरीलगायत विभिन्न सामाजिक संस्थामार्फत समाजसेवामा निरन्तर सक्रिय रहनुभयो ।
सन् २००९ मा बेलायत पुगेपछि नयाँ परिवेश, भाषा र परिस्थितिसँग संघर्ष गर्दै उहाँले जीवनलाई पुनः शून्यबाट सुरु गर्नुभयो । निरन्तर मेहनत र आत्मविश्वासका साथ अघि बढ्दै हाल उहाँ लन्डनस्थित एक सरकारी अस्पतालको सर्जरी विभागमा कार्यरत हुनुहुन्छ ।
बेलायत बसाइँका क्रममा पनि उहाँ विभिन्न सामाजिक तथा सांस्कृतिक संस्थामा सक्रिय रहनुभयो । किरात याक्थुङ चुम्लुङ यूकेको सचिव र उपाध्यक्ष, नेपाल आदिवासी जनजाति महिला महासंघ बेलायतकी संस्थापक महासचिव तथा नेपाल आदिवासी जनजाति महासंघ यूकेको महासचिवका रूपमा उहाँले महत्वपूर्ण जिम्मेवारी निर्वाह गर्नुभएको छ । साथै, सेवारो कलाकार संघ यूकेमा पनि उहाँको सक्रिय भूमिका रहँदै आएको छ ।
व्यस्त जीवनशैलीका बाबजुद पनि उहाँले सञ्चार क्षेत्रलाई निरन्तरता दिनुभयो । नेपाली टिभी यूकेमार्फत समाचार वाचन तथा “नमस्ते युरोप” कार्यक्रम सञ्चालन गर्नुभएकी उहाँले पछि सहकर्मीहरूसँग मिलेर “गोर्खा च्यानल” स्थापना गर्नुभयो । हाल उक्त माध्यममार्फत समाचार, अन्तर्वार्ता तथा विभिन्न सामाजिक गतिविधिहरू नियमित रूपमा प्रसारण हुँदै आएका छन् ।
नेपाल पत्रकार महासंघ (एफएनजे) यूकेको उपाध्यक्षको जिम्मेवारी सफलतापूर्वक निर्वाह गरेपछि अध्यक्षमा निर्वाचित हुँदै उहाँले महिला नेतृत्वको नयाँ इतिहास रच्नुभएको हो ।
हाल श्रीमान् र एक छोरासहित बेलायतको राजधानी लन्डनमा बसोबास गरिरहनुभएकी उहाँले विभिन्न सम्मान तथा पुरस्कार प्राप्त गर्नुभएको छ । “आदिवासी वर्ष महिला २०२४” सम्मानसहित महिला सशक्तीकरण, पत्रकारिता, सामाजिक सेवा तथा कला–संस्कृतिमा पुर्याउनुभएको योगदानका लागि विभिन्न संघसंस्थाबाट सम्मानित हुनुभएको छ ।
परदेशमा रहेर पनि परिवार, पेशा, समाजसेवा र नेतृत्वलाई सन्तुलित रूपमा अघि बढाउँदै समाजमा सकारात्मक योगदान दिन सकिन्छ भन्ने प्रेरणादायी उदाहरणका रूपमा बिमला सेने आज धेरै नेपाली महिलाका लागि प्रेरणाको स्रोत बन्नुभएको छ ।
साभार– एभरेष्ट टाईम युके
क्वालालम्पुर । मलेसियामा क्रियाशील तेह्रथुम मलेसिया सम्पर्क मञ्चको पाँचौँ अधिवेशन मलेसियाको राजधानी क्वालालम्पुरस्थित कोतारायको होटल प्यासिफिकमा २८ डिसेम्बरमा भव्य रूपमा सम्पन्न भएको छ।
अधिवेशनले मञ्चको विगतका गतिविधिको समीक्षा गर्दै आगामी दिनमा सामाजिक एकता, आपसी सहयोग तथा तेह्रथुम जिल्लाको पहिचान, संस्कृति र सामुदायिक हितका लागि अझ प्रभावकारी भूमिका निर्वाह गर्ने प्रतिबद्धता व्यक्त गरेको छ।
e!
अधिवेशनबाट तोया रोशन ढकालको अध्यक्षतामा नयाँ कार्यसमिति सर्वसम्मत रूपमा चयन गरिएको छ।
कार्यक्रमका संरक्षक इन्द्र नारायण लिम्बुले मन्तव्य राख्दै प्रवासमा रहेका तेह्रथुमे समुदायलाई एकताबद्ध गर्दै संस्थालाई पारदर्शी, उत्तरदायी र परिणाममुखी बनाउँदै लैजानुपर्नेमा जोड दिनुभयो।
कार्यक्रममा सचिव मनोज लिम्बुले संस्थाको आर्थिक तथा प्रगति प्रतिवेदन प्रस्तुत गर्नुभएको थियो।
अधिवेशनका प्रमुख अतिथि NRNA मलेसिया अध्यक्ष तथा संस्थाका संयोजक इन्द्र नारायण लिम्बुले प्रवासमा रहेका नेपालीहरूबीच आपसी सहकार्य, सामाजिक उत्तरदायित्व र जिल्लागत संस्थाहरूको भूमिकालाई अझ सशक्त बनाउनुपर्ने आवश्यकता औँल्याउनुभयो।
कार्यक्रमको सभाध्यक्षता सल्लाहकार समिति संयोजक पदम राज लिम्बुले गर्नुभएको थियो।
अधिवेशन कार्यक्रमको सञ्चालन नेपाल पत्रकार महासङ्घ तेह्रथुमका अध्यक्ष टिआर सेनेहाङले गर्नुभएको थियो। कार्यक्रममा पत्रकारिता, साहित्य र संस्कृतिको क्षेत्रमा पुर्याएको योगदानको कदर गर्दै सेनेहाङलाई विशेष सम्मानसमेत प्रदान गरिएको थियो।
अधिवेशनबाट चयन भएको कार्यसमिति यसप्रकार रहेको छः
अध्यक्ष: तोया रोशन ढकाल
वरिष्ठ उपाध्यक्ष: महेन्द्र बस्नेत
उपाध्यक्षहरू: उमा खजुम, नगेन्द्र दाहाल
महासचिव: मनोज लिम्बु
सचिव: निर्मल लिम्बु
सह–सचिव: सुनिता जबेगु
कोषाध्यक्ष: अटल सेनेहाङ
सह–कोषाध्यक्ष: रुपा थाम्देन
सदस्यहरू:
नेत्र संग्रौला, हस्तविर कार्की, डिल्लि कुमार तामाङ
सल्लाहकार समिति:
संयोजक: पदम राज लिम्बु
सदस्यहरू: चन्द्र फेदाप, टंक निङ्लेकु, पूर्ण गुरुङ, सुजता कार्की, सुनिल खड्का
कार्यक्रममा उपस्थित वक्ताहरूले नव–निर्वाचित कार्यसमितिलाई बधाई तथा सफल कार्यकालको शुभकामना व्यक्त गर्दै प्रवासमा रहेका तेह्रथुमेहरूको हित, एकता र सहकार्यलाई अझ मजबुत बनाउँदै लैजान आग्रह गरेका थिए।
अधिवेशन सौहार्दपूर्ण वातावरणमा सफलतापूर्वक सम्पन्न भएको तेह्रथुम मलेसिया सम्पर्क मञ्चले जनाएको छ।