तेह्रथुम, १५ माघ
तेह्रथुमको दुर्गम भेग मेन्छ्यायेम गाउँपालिका–२ पौठाकका स्थानीयबासीलाई सामान्य सुरक्षा सेवाका लागि समेत टाढा जानुपर्ने बाध्यता थियो। यही समस्यालाई मध्यनजर गर्दै यहाँ अस्थायी प्रहरी चौकी स्थापना गरिएको छ । प्रहरी चौकी स्थापनाले स्थानीयवासी हर्षित भएकाछन् ।
पुर्व प्रहरी महानिरिक्षक चन्द्रकुवेर खापुङको आफ्नै पालिका मेन्छ्यायेम २ पौठाकमा लामो समयदेखि प्रहरी चौकीको अभावले स्थानीयबासी असुरक्षित महसुस गर्दै आएका थिए। तर आज यहाँको दृश्य फरक छ—स्थानीयको अनुहारमा राहत, खुसी र आशा देखिन्छ। किनकी यहाँ अस्थाई प्रहरी चौकीको स्थापना भएको छ । यो चौकी पूर्व प्रहरी महानिरीक्षक खापुङको पहलमा स्थापना भएको हो। आज एक औपचारिक कार्यक्रम बीच खापुङले रिबन काटेर चौकीको उद्घाटन गर्नुभयो। कार्यालय उद्ध्घाटन गर्दै उहाँले प्रहरी र नागरिकबीचको भरोसा नै शान्ति सुरक्षाको आधार भएको बताउनुभयो।
हाल प्रहरी चौकी घर भाडामा लिएर सञ्चालन गरिएको छ। गाउँपालिकाले भाडा व्यहोर्ने र आगामी दिनमा स्थायी भवन निर्माणका लागि पहल गर्ने मेन्छ्यायेम गाउपालिकाका अध्यक्ष यादव बहादुर खापुङले बताउनुभयो ।
प्रहरी चौकी स्थापनाले अपराध नियन्त्रण, तत्काल सुरक्षा प्रतिक्रिया र सुशासन कायम गर्न महत्वपूर्ण भूमिका खेल्ने स्थानीयबासीले अपेक्षा गरेका छन् । चौकी स्थापनाले समाजमा शान्ति सुरक्षा कायम हुने प्रमुख जिल्ला अधिकारी बन्दना राईले बताउनुभयो ।
दुर्गम क्षेत्रका नागरिकलाई राज्यको सुरक्षा संयन्त्रसँग जोड्ने यो पहल संगै शान्ति सुरक्षा र सुशासन कायम गर्ने विश्वास लिइएको स्थानीयबासी दिलकुमारी शंकरको भनाई छ ।
प्रहरी, प्रशासन, जनप्रतिनिधि तथा स्थानीयबासीको सहभागितामा सम्पन्न उद्घाटन कार्यक्रमसँगै पौठाकमा शान्ति सुरक्षाको नयाँ आधार तयार भएको विश्वास लिइएको छ। तेह्रथुम जिल्लामा हाल जिल्ला प्रहरी कार्यालयसहित २ वटा इलाका प्रहरी कार्यालय,१० वटा प्रहरी चौकी, १ अस्थायी प्रहरी चौकी,५ अस्थायी प्रहरी पोष्ट, जिल्ला ट्राफिक प्रहरी कार्यालय १ र ट्राफिक प्रहरी पोष्ट १ वटा सञ्चालनमा छन्।
