तेह्रथुम/नेपाल पत्रकार महासंघ यूके शाखाको नेतृत्व हाल बिमला सेनेले सम्हालिरहनुभएको छ । २०८१ असार ३० गते सम्पन्न निर्वाचनबाट उहाँ अध्यक्षमा निर्वाचित हुनुभएको हो । यससँगै उहाँ महासंघ यूकेको इतिहासमा पहिलो महिला अध्यक्ष बन्न सफल हुनुभएको छ ।
पत्रकारिता तथा सामाजिक क्षेत्रमा लामो समयदेखि सक्रिय रहँदै आउनुभएकी सेने नेपाल आदिवासी जनजाति महासंघ यूकेको पूर्वमहासचिव समेत हुनुहुन्छ । उहाँले सञ्चालन गर्दै आउनुभएको “गोर्खा च्यानल मिडिया” बेलायतस्थित नेपाली समुदायबीच लोकप्रिय सञ्चार माध्यमका रूपमा परिचित छ ।
तेह्रथुमको सोल्मास्थित रत्न माध्यमिक विद्यालयबाट जनजातितर्फ एसएलसी उत्तीर्ण गर्ने पहिलो महिला तथा उच्च शिक्षा हासिल गर्ने पहिलो महिलामध्ये एकका रूपमा उहाँ चिनिनुहुन्छ । अध्ययन, परिवार र पेशालाई सन्तुलित रूपमा अघि बढाउँदै उहाँले आफ्नो जीवनयात्रालाई निरन्तर संघर्ष र सफलतासँग जोड्नुभएको छ ।
विवाहपछि श्रीमान्सँग हङकङ पुग्नुभएकी उहाँले त्यहाँ वीएफएस रेडियो (ब्रिटिस फोर्सेस ब्रडकास्टिङ सर्भिस) मा काम गर्दै व्यावसायिक जीवनको सुरुआत गर्नुभएको थियो । नेपाल फर्किएपछि एकाउण्टेन्टका रूपमा काम गर्नुका साथै सप्तकोशी एफएममार्फत समाचार वाचन तथा कार्यक्रम सञ्चालन गरेर सञ्चार क्षेत्रमा आफ्नो सक्रियता विस्तार गर्नुभयो ।
महिला आर्थिक रूपमा सक्षम र आत्मनिर्भर नभएसम्म समाजमा वास्तविक परिवर्तन सम्भव हुँदैन भन्ने विश्वासका साथ उहाँले इटहरीका महिला साथीहरूसँग मिलेर महिला बचत तथा ऋण सहकारी स्थापना गर्न महत्वपूर्ण भूमिका निर्वाह गर्नुभयो । उक्त सहकारी आज महिलाद्वारा सञ्चालित सफल संस्थामध्ये एकका रूपमा परिचित छ ।
सञ्चार क्षेत्रसँगै सामाजिक सेवा, सहकारी अभियान तथा संस्थागत नेतृत्वमा पनि उहाँको सक्रिय भूमिका रहँदै आएको छ । इटहरी जेसीसको अध्यक्षका रूपमा नेतृत्व सम्हाल्नुभएकी उहाँ रेडक्रस सोसाइटी, रोटरी क्लब इटहरीलगायत विभिन्न सामाजिक संस्थामार्फत समाजसेवामा निरन्तर सक्रिय रहनुभयो ।
सन् २००९ मा बेलायत पुगेपछि नयाँ परिवेश, भाषा र परिस्थितिसँग संघर्ष गर्दै उहाँले जीवनलाई पुनः शून्यबाट सुरु गर्नुभयो । निरन्तर मेहनत र आत्मविश्वासका साथ अघि बढ्दै हाल उहाँ लन्डनस्थित एक सरकारी अस्पतालको सर्जरी विभागमा कार्यरत हुनुहुन्छ ।
बेलायत बसाइँका क्रममा पनि उहाँ विभिन्न सामाजिक तथा सांस्कृतिक संस्थामा सक्रिय रहनुभयो । किरात याक्थुङ चुम्लुङ यूकेको सचिव र उपाध्यक्ष, नेपाल आदिवासी जनजाति महिला महासंघ बेलायतकी संस्थापक महासचिव तथा नेपाल आदिवासी जनजाति महासंघ यूकेको महासचिवका रूपमा उहाँले महत्वपूर्ण जिम्मेवारी निर्वाह गर्नुभएको छ । साथै, सेवारो कलाकार संघ यूकेमा पनि उहाँको सक्रिय भूमिका रहँदै आएको छ ।
व्यस्त जीवनशैलीका बाबजुद पनि उहाँले सञ्चार क्षेत्रलाई निरन्तरता दिनुभयो । नेपाली टिभी यूकेमार्फत समाचार वाचन तथा “नमस्ते युरोप” कार्यक्रम सञ्चालन गर्नुभएकी उहाँले पछि सहकर्मीहरूसँग मिलेर “गोर्खा च्यानल” स्थापना गर्नुभयो । हाल उक्त माध्यममार्फत समाचार, अन्तर्वार्ता तथा विभिन्न सामाजिक गतिविधिहरू नियमित रूपमा प्रसारण हुँदै आएका छन् ।
नेपाल पत्रकार महासंघ (एफएनजे) यूकेको उपाध्यक्षको जिम्मेवारी सफलतापूर्वक निर्वाह गरेपछि अध्यक्षमा निर्वाचित हुँदै उहाँले महिला नेतृत्वको नयाँ इतिहास रच्नुभएको हो ।
हाल श्रीमान् र एक छोरासहित बेलायतको राजधानी लन्डनमा बसोबास गरिरहनुभएकी उहाँले विभिन्न सम्मान तथा पुरस्कार प्राप्त गर्नुभएको छ । “आदिवासी वर्ष महिला २०२४” सम्मानसहित महिला सशक्तीकरण, पत्रकारिता, सामाजिक सेवा तथा कला–संस्कृतिमा पुर्याउनुभएको योगदानका लागि विभिन्न संघसंस्थाबाट सम्मानित हुनुभएको छ ।
परदेशमा रहेर पनि परिवार, पेशा, समाजसेवा र नेतृत्वलाई सन्तुलित रूपमा अघि बढाउँदै समाजमा सकारात्मक योगदान दिन सकिन्छ भन्ने प्रेरणादायी उदाहरणका रूपमा बिमला सेने आज धेरै नेपाली महिलाका लागि प्रेरणाको स्रोत बन्नुभएको छ ।
साभार– एभरेष्ट टाईम युके
तेह्रथुम/ नेपाल पत्रकार महासंघ तेह्रथुम शाखाको चौधौँ वार्षिक साधारणसभा म्याङलुङ बजारस्थित देउराली सोसाईटी को सभाहलमा विविध कार्यक्रमका साथ सम्पन्न भएको छ । साधारणसभामा पत्रकारिताको मर्यादा, व्यावसायिक आचरण, सञ्चारमाध्यमको विश्वसनीयता तथा बदलिँदो प्रविधिसँगै पत्रकारितालाई जिम्मेवार र जनमुखी बनाउनुपर्ने विषयमा जोड दिइएको थियो ।
कार्यक्रमका प्रमुख अतिथि जिल्ला समन्वय समिति तेह्रथुमका प्रमुख गुमान सिं ईश्वो ले लोकतन्त्रको सुदृढीकरण, सुशासन र जनताका आवाजलाई बुलन्द बनाउन पत्रकारिताको भूमिका महत्वपूर्ण रहेको बताउनुभयो । उहाँले सत्य, निष्पक्ष र उत्तरदायी पत्रकारिताले समाजलाई सही दिशातर्फ लैजान सहयोग पुग्ने धारणा राख्नुभयो ।
त्यसैगरी विशेष अतिथि तथा साधारणसभाका प्रतिनिधि नेपाल पत्रकार महासंघ कोशी प्रदेश समिति सदस्य किसोर विश्वकर्मा ले पछिल्लो समय पत्रकारितामा देखिएका चुनौती, सामाजिक सञ्जालको प्रभाव र एआई प्रविधिको बढ्दो प्रयोगबीच पत्रकारहरू अझ जिम्मेवार बन्नुपर्ने आवश्यकता औँल्याउनुभयो । उहाँले पत्रकारको पेशागत हकहित, क्षमता विकास र प्रेस स्वतन्त्रताको संरक्षणका लागि महासंघ निरन्तर सक्रिय रहने बताउनुभयो ।
कार्यक्रममा नेपाल पत्रकार महासंघ तेह्रथुमका अध्यक्ष टिआर सेनेहाङ ले संस्थागत प्रगति प्रतिवेदन प्रस्तुत गर्दै शाखाले वर्षभरि सञ्चालन गरेका गतिविधि, पत्रकार क्षमता अभिवृद्धिका कार्यक्रम, सञ्चारकर्मीको पेशागत सुरक्षा तथा संगठन सुदृढीकरणका प्रयासबारे जानकारी गराउनुभयो । उहाँले बदलिँदो सञ्चार प्रविधिसँगै पत्रकारितालाई थप विश्वसनीय, तथ्यपरक र जनउत्तरदायी बनाउँदै लैजान सबै पत्रकार एकजुट हुनुपर्नेमा जोड दिनुभयो ।
नेपाल पत्रकार महासंघ तेह्रथुमका सचिव कृष्ण विदुखी गौतम ले कार्यक्रमबारे जानकारी गराउनुभएको थियो भने कार्यक्रम सञ्चालन महासंघका उपाध्यक्ष सीता लिम्बु ले गर्नुभएको थियो ।
साधारणसभामा सहभागी पत्रकार तथा अतिथिहरूले पत्रकारिता केवल पेशा मात्र नभई समाजप्रतिको जिम्मेवारी र जनविश्वासको आधार भएकाले सत्य, निष्पक्षता र नैतिकतालाई केन्द्रमा राखेर काम गर्नुपर्ने धारणा व्यक्त गरेका थिए । साथै स्थानीय मुद्दा, विकास निर्माण, शिक्षा, स्वास्थ्य, कृषि, पर्यटन तथा नागरिक सरोकारका विषयलाई प्राथमिकताका साथ उठाउनुपर्ने आवश्यकता औँल्याइएको थियो ।
कार्यक्रममा जिल्लास्थित सञ्चारकर्मी, विभिन्न संघसंस्थाका प्रतिनिधि तथा सरोकारवालाहरूको सहभागिता रहेको थियो ।
